عطوني عيدية

السلام عليكم ورحمة الله وبركاته..

عيدكم مبارك .. و تقبل الله منا ومنكم صالح الأعمال.. وأدخلنا وإياكم باب الريان..

العنوان ماله دخل.. بس اللي وده يعطين عيدية ما أقول لأ.. وحبذا تكون شيء له دخل بالتصوير..

وبسررعة قبل لا يبدأ دوامي.. :P

 مثلاً مثلاً اللي يبي يشتري لي عدسة.. ولا سوفت بوكس .. ولا فلاش.. << طولت عمتنا..

المهم.. كعادتي هـ الأيام.. كل شوي أجرب لكم شيء وأعرضه..

جلست أدور بصور العيد و ماش مالقيت شيء مرة يستاهل ينعرض.. إلا كم صورة بس يبيلي أستأذن من أهاليهم.. قلت خلاص عاد ماله داعي اعرضهن هنا.. :/

عاد يوم رجعنا من الرياض جلست أجرب أصور بروتريه..

بصراحة النتايج ما أرضتني مرة.. بس نقدر نقول :حلوة كـبداية :/

صورة أخوي  أحمد..

اضغط على الصورة للتكبير

وعسى أعيادكم فرح وسرور وتعود علينا وعليكم بالخير..

تجربة تصوير Water splashes

اضغط على الصورة للتكبير

 تعبت بجد لين حصلت على هـذي النتيجة.. :/

بس الحمدلله أخيراً سويتها D:

أول ما بديت سويتها بالمطبخ.. مع اختي ثراء مساعدتي دائماً في تجاربي التصويرية..

كان الوقت ع الساعة 1 أو 1:30  بالليل.. بس كانت النتايج تضحك.. و الخلفية كان طالع لونها رمادي ﻷنها قريبة :/ وبالأخير حصلت على صورة السبلاش بس كنت مسوية زووم ع الكاس .. و طلع نص السبلاش طالع مو كلّه : )

وهذي النتيجة الأولى.. وكنت أرمي حبة عنب ..

ماكانت النتيجة تسوى ..بس كنت مستانسة فيها .. قلت بالطقاق خليها تطلع حوسة بس أهم شيء اني جربت .. والمرة الجاية بعدل لين أحصل على صورة زينة ..

وكنت ناوية أجرب من بكرة مرة ثانية..بس يوم جلست شوي.. قلت خل أجرب مرة ثانية وش يمنعني .. أصلاً انا كذا ولا كذا فاضية..

المشكلة خلصت بطارية الكاميرا وجلست ساعة أشحنها.. و جيت أجرب ثانية لما جت السـاعة 3..! وكان معي أخوي فهد يساعدني شوي.. حتى يطفي لي النور قبل لا أرمي ربع ليمونة هـالمرة .. P:

و يوم جيت أبدأ إلا والخدامة تدخل تبي تسوي السحور..خخخخ
قلت : ماعلي منك استني ابطفي النور  وأصور هنا مالي دخل مانيب طالعة إلا وأنا مصورة .. قالت : خلاص خلاص طيب معليش..

المهم.. وابدا أجرب.. وأول شي طلعت معي ذي النتيجة:

اضغط على الصورة للتكبير

وبعدين طلعت بالصورة الجميلة ذي اللي حطيتها بأول التدوينة :

وبعدها عاد كبر راسي وقلت بجرب أصور صور ثانية وأشوف شكل الموية وش بيطلع وأختار منهم ..P;

بس للأسف كل الصور اللي بعدها تصير قبل ماتوصل للموية :

و لا تصير الليمونة على سطح الموية بالضبط..خخخخخ :

و المرتين الأخيرات الليمونة ما طاحت بالكأس أصلاً.. تطيح على جنب..خخخخ

 قامت الشغالة قالت: "خلاااص هذا صورة أول واهد هيلوو مررآآ .. خلاص انا يبغى سوي سهور! "


>~ تبي تفتك مني خلاص ملت.. تقول لي صورتك الأولى حلوة ..

 أهـم شيء طلعت بنتيجة تسوي.. موب زي أول نتيجة وع ..خخخخ

آراؤكم 3<.. وانتقاداتكم .. 3>



الطريقة طبقتها من مدونة شخص أجنبي هنا

تـجارب تصوير

 صـباحكم سرور.. =(

قبل اسبوع تقربياً .. اختي سوت Cupcake  وجلست أسوي معاها الزينة.. وبعدين لما خلصت فكرت اني اصوره..وأجرب اطوّر تصويري فيه.. خصوصاً اني لي مدة وأنا دايماً أدخل دروس تصوير بالنت.. واتعلم أكثر.. فقلت خل أطبق واجرب .. D:
وهذي الصورتين من النتائج:

اضغط على الصورة حتى تنفتح بالحجم الأصلي

اضغط على الصورة  حتى تنفتح بالحجم الأصلي

الصورة الثانية أحس زايدة الإضاءة فيها شوي.. عاد ماسويت أي معالجة للصور..

يمكن لو سويت معالجة للصورة الثانية راح تكون أحلى..


وهنا سويت تطبيق ﻷحد الدروس اللي لقيتها بمدونة أحد المصورين..

و جازت لي صراحة 3> وهي ان الشخص نفسه يكون موجود أكثر من مرة في نفس الصورة.. وبصراحة يبيلها دقة في التنفيذ :/

 حبيت أعرضها لكم وأوريكم اياها.. وش رايكم..؟! P:

اضغط على الصورة حتى تنفتح بالحجم الأصلي

لا يهمكم اللبس ..XD  عيا علي يغيّـر ويكشخ.. قلت أهم شيء أطبق الدرس وأشوف وش يطلع معي.. P:

أنا أحب التصوير .. وكثير أقرأ عن التصوير بالنت.. وأقرأ الدروس و كيف أتعامل مع الكاميرا ..و من زمان شارية الكاميرا وقاعدة أحاول أطور نفسي فيها .. لكن ماكانت نتائجي ترضيني.. :( غير اني انشغلت كثير بدراستي.. والحمدلله الحين إجازة و عندي وقت..

أفكرأفتح لي فليكر.. عشان أتحمس أصور..  وأطوّر هوايتي أكثر.. 3>

قربت العشـر الأواخر من رمضان.. 

أدعو الله لي ولكم أن لا ينتهي هذا الشهر إلا وقد رحمنا وغفر لنا و أعتقنا من النار.. 3> : (

 آميــن   

رمـضانـكم مبـارك

 السلام عليكم ورحمة الله وبركاته.. 


من زمان عن المدونة.. تعرفون ماصدقت تجي العطلة إلا و افرغ كل طاقاتي في النوم و التسدح و التلفزيون والأفلام وكل ما هو غير مفيد و مضيعة للوقت .. P: 

  مبـارك عليكم الشـهر .. ولو انه انتصف =$

ربي يبارك لنا جميعاً في هذا الشهر الفضيل ويقدرنا على صيامه و قيامه على أتم وجه ..

وبها المناسبة الكريمة.. وفي هـ الأيام المباركة للشهر الفضيل حبيت أخصص تدوينتي في الكلام عن هـ الشهر وفضله.. وعن بداياته.. وأي شيء أحس ودي أخبركم إياه..=)

أول شيء واللي الجميع يعرفه ان القرآن الكريم تنزل للنبي عليه الصلاة والسلام في شهر رمضان المبارك.. في عام 13 قبل الهجرة الموافق لـ 610 بعد الميلاد .. و كلنا نعرف القصة كيف تنزل الوحي على نبينا محمد وهو في غار حراء.. ابتداءً بكلمة " إقرأ".. سورة العلق

لكـن لم يفرض الصيام على المسلمين في شهر رمضان حتى السنة الثانية للهجرة.. وفرض معه الجهاد و الزكاة في تلك السنة ..

في عام 8 بعد الهجرة.. تم فتح مكة في 20 رمضان .. ثم دخل الناس في دين الإسلام أفواجاً كثيرة بفضل الله تعالى ..

معروف طبعاً ولا يخفى عليكم مافي رمضان من فضل عظيم .. وذكر الرسول صلى الله عليه وسلم: [ من صام رمضان إيماناً واحتساباً غُفر له ما تقدّم من ذنبه ]

ولكن اللي يخفى على ناس كثير هو عقد النية بإخلاص وإحسان و إحتساب لله تعالى .. ﻷن بكذا لو حصل للشخص شيء و ما قدر يتم فيه صيامه أو يقوم رمضان زي ما كان ناوي عليه .. راح يجزيه ربي الأجر كامل لنيته !  3>

فيه قصة حبيت أذكرها.. مدري هو يصلح موضعها هنا ولا ﻷ.. بس أحس لها ارتباط بالنية 3>

يقول الإمام أحمد بن حنبل رحمه الله :
كنت أسير في طريقي فإذا بقاطع طريق يسرق الناس ، وبعدها بأيام رأيت نفس الشخص اللص يصلي في المسجد ، فذهبت إليه وقلت : هذه المعاملة لا تليق بالمولى تبارك وتعالى ، ولن يقبل الله منك هذه الصلاة وتلك أعمالك ، فقال السارق : يا إمام ، بيني وبين الله أبواب كثيرة مغلقة ، فأحببت أن أترك باباً واحداً مفتوحا!!ً

بعدها بأشهر قليلة ذهبتُ لأداء فريضة الحج ، وفي أثناء طوافي رأيت رجلا متعلقاً بأستار الكعبة يقول: تبتُ إليك .. ارحمني .. لن أعود إلى معصيتك..!

فتأملتُ هذا الأوّاه المنيب الذي يناجي ربه ، فوجدته لص الأمس .. فقلتُ في نفسي : ترك باباً مفتوحاً ففتح الله له كل الأبواب !

سبحان الله .. كانت نيته انه يفتح بينه وبين ربه باب.. وربي كريم.. فتح له أبواب رحمته.. وجعله يتوب إليه ..

إياك أن تغلق جميع الأبواب بينك وبين الله عز وجل حتى ولو كنت عاصياً وتقترف معاصيَ كثيرة ، فعسى باب واحد أن يفتح لك أبوابًا ..


 و كـل سنة وانتم طيبين .. والله يعيده علينا وعليكم  بصحة وعافية ..

بالمناسبة .. تاريخ اليوم هو : 22 - 9 - 2010 م .. وهذا يعني انه مرت سنة كاملة من تدويني ﻷول تدوينة في مدونتي المتواضعة.. =$

كل عام و انتِ طيبة يا مدونتي العزيزة .. 3>

اليوم الملحمة.. اليوم الماراثون.. سمّوه ماشئتم!!

اليوم ..!!!! O_o

أطول يوم مر علي.. وأتعب يوم وأحلى يوم وأتحف يوم..!! -_- !

خخخخخخخ P:

أول شي بدت معي أمس يوم تفاجأت ان الاختبار العملي لمادة تركيبات الأسنان نختبره اليوم!!

هو طبعاً عندنا اليوم كويز و اختبار شفهي لمادة ثانية..! :) هذا غير إني أنا ومجموعة من البنات عندنا برزنتيشن(عرض تقديمي) لـمحاضرة إضافية لـهذي المادة..

يعني صار الموضوع حفلة..!!

يوم رجعت للبيت بعد دوام يوم الثلاثاء.. مدريوش أسوي هل أذاكر للاختبار الشفهي..؟! ولا للكويز؟ ولا للعملي حق المادة الثانية.. ولا أجلس اتدرب على البرزنتيشن اللي ماتدربت عليه كفاية..؟!! ×_×

أول شيء بديت اتدرب على البرزنتيشن شوي..بعدين بديت أذاكر للاختبار الشفهي,, لأن البنات الله يعافيهم ارسلوا ملف بور بوينت يوضح الأدوات  والمواد اللي ممكن نتسئل عليها.. فـ ذاكرت شوي منها..

بعدين رحت مسكت المادة الثانية وراجعت شوي للـطريقة اللي نصمم فيها تركيبات الاسنان المتحركة عشان نختبر عليها.. وبما اننا راجعنا يوم الثلاثاء كان الموضوع اسهل شوي.. "^_^

بعدين قمت اراجع البرزنتيشن واتكلم عن جزئيتي قدام المراية حتى أتدرب عليها أكثر,,

وبعدها طبعت المحاضرة اللي عليها الكويز وقمت أقراها شوي لين حسيت اني فهمتها.. ^_<

بعدها عاد تركت المذاكرة على جنب.. وقمت أتدرب على البرزنتيشن قدام المراآية ياحبيلها ..<~  :D P:

لين جت حوالي 1ونص تقريباً ونمت.. بعدين صحيت الفجر.. وبعد الصلاة راجعت البرزنتيشن.. والاختبار الشفهي..

المهم عاد اليوم مر زي الحلم ياربيييه.. تعبانة.. <~ o_O

اول شي الصباح  وأنا بالطريق..تذكرت جوالي مدري وش أبشيّك عليه..وجلست أفتش بالشنطة مالقيته ..!

عاد تذكرت اني قبل لا اطلع من الغرفة فصلته من الشاحنوحطيته على الطاولة وطلعت بالشنطة بدون ما آخذه من الطاولة..! :|

انقهرت شوي بعدين قلت لنفسي.. يالله معليش وش تفرق عادي.. ماراح استخدمه كثير.. وبعدين اليوم راح أتأخر وأطلع مع الباص..وعادي ومعليش.. D:  << حلو التسليك وكذا..

و يوم وصلنا الجامعة قمت أراجع شوي لاختبار العملي.. وشريت كوفي موكآ لزوم أصحصح وكذا.. D:

بعدين قعدت شوي.. إلا و وحدة من البنات تقول لي يوه وسختي نفسك..! -_-
أنا : ! وشو وسّخت نفسي؟
قالت : شوفي كبيتي كوفي على لاب كوتك.. (البالطو)
أنا: :'(  خلاص بصيح لااآاآآع موب ذا وقته.. واليوم عندي برزنتيشن..
ركضت للحمامات وحاولت أغسـله شوي حتى يخف.. والحمدلله أنقذتني نورة صديقتي .. D:  معها مادة تزيل البقع مفعولها فوري.. مرررة حلوة للحالات اللي زي كذا.. حلو شكلها زي القلم ومكتوب عليها  Tide ..

طبعا صار لاب كوتي نصه مويه.. + شوي من المادة ذي حتى تروح البقع..عاد بالأخير بعد ساعتين كذا اختفوا البقع ما ينشاف شيء الحمدلله.. ^_*

بعد ما غسلت لاب كوتي شوي كذا عشر دقايق وبدينا اختبار العملي .. حق تركيبات الأسنان.. واللي هو على كذا تصميم الشكل اللي راح يكون عليه التركيبة المتحركة على حسب حالة المريض اللي جاي .. كم فقد من أسنان و ايش يطلب .. وكذا..

المهم .. سلمونا حالتين.. وسمينا بالله وبدينا نحل.. :)

و بعد ما مر أكثر من نصف الوقت.. أنا حليت وحدة من الحالتين كانت سهلة بس يبيلي اراجعها.. قمت خليتا قدامي مفتوحة على الرسمة.. والحالة الثانية قريبة مني وجالسة احل عليها.. بحيث لما أضيع بالحالة الثانية أقوم أراجع الأولى حتى ما يضيع وقتي ع الفاضي,,

وبينما أنا على تلكما الحالة.. P:  جت وحدة من الدكتورات الله يصلحها مادري وش عندها متحمسة!!! O_o  قالت لي: ليه الورئة دي مفتوحة؟! ماخلصتيش منها وبتحلي بالكيس التانية؟ أمال ليه فاتحة دي ؟!
أنا : -_-  !! وابتسمت لها ومدري وش أقول لها.. ومدري وش قصدها ومدري وش تبي..!!!

وبعدين استوعبت ان الورقة مفتوحة بحيث انها شكت اني أغشش اللي بجنبي ..! -_-  (ياصباح الليل بس هي وذا التفكييير!!)
بعدين قلت لا عادي.. قالت : اسمك إيه ؟!
عاد هي ووجهها سكرت لي   الورقةومكتوب اسمي بالصفحةالأولى ورقمي الجامعي والتسلسلي.. يعني مدري وش تحس..!

قلت: ليييه؟! o_O
قالت : أولي لي اسمك ايه بس.. واشرت لها على اسمي بورقة التحضير اللي معاها.. بس بفتك منها وبكمل احل اختباري..!

وبعدي راحت للي بجنبي :'( !!!
سألتها عن اسمها مدري رقمها التسلسلي.. المهم..! رحمت البنت!! وشدخلها .. ولا كانت ملتفته علي ولا اشي وياعمري والله متحمسة تحل..! بس اصرّت عليها الدكتورة انها تاخذ اسمها..

قالت والله ماغشيت.. وبعدينشوفي اوراقنا إذا كانت تصميماتنا تتشابه ولا لأ!!

بس راحت الدكتورة وماعطتهاوجه..

والله يانا بذيك اللحظةحسيت ودي انفجرعليها ورحمت اللي بجنبي .. وش دخّلها بالسالفة.. حسيت بالذنب أن اللي صار لها بسببي..! وانا والله ماكان قصدي.. بس الدكتورة الحمدلله والشكر تفكيرهالا مدري وش يبي..!

عاد لما خلصنا .. وسلمت ورقتي.. نسلمها عند الدكتورة ثقيلة الطينة المذكورة أعلاه..
قلت لها: دكتورة .. ابغى اتكلم معك عن اللي صار قبل شوي.. قالت وهي تبتسب كذا ومروقة : ولا حصل حاقة .. و مافيش حاقة ومدري وش..!

أنا : O_o !!!!

وش عندها ذي.. طيب ليش بهذلتني بالاختبار..! من جدها ولا وش!

عاد يوم طلعت.. زميلاتي بالمعمل الثاني قالوا لي انها بعد ابلشتهم قبل لا يبدون واني كاشفة حركاتكم ولا تحاولون تغشون ومدري وش..!

الحمدلله بس .. إن شاء الله انه عدّى على خير.. ويارب تكون درجاتنا حلوة..:)

بعد ماطلعنا عاد رحنا لقاعتنا عشان نتدرب ونعدل اللي يبي له تعديل وغيره .. كانت الساعة حوالي 10 ونص.. واحنا راح نبدأ البرزنتيشن على الساعة 12..

حسيت يطني بدأ يوجعني شوي.. << خوف وتوتر .. P:

 بعدها قلت اتدرب شوي قدام البنات.. مع أنهم مشغولين وماعطوني وجه.. P:  بس كان تدريب حلو.. وقواني شوي قبل لا يبدأ البرزنتيشن الصدقي..

جت الساعة 12.. وجت دكتورتنا..وقالت :عندي لكم مفآجأة.. 3> بعدين شافت على الطاولة صينية ومغطينها .. قمت قالت : ايش هذا.. ع أساس تبغى تشيله وتجيب مفاجأتها .. تدور لها مكان يعني..

عاد بنات مجموعتنا بالبرزنتيشن ردوا عليها : قالوا لاااء :| هذي مفاجأة .. D:  (جايبين كب كيك ومكتوب عليهم اسم محاضرتنا)

قعدت تضحك علينا وشافت اننا حاطين عصيرات بعد..قالت حتى انتم خخخخ.. <~ صرنا يعني كلنا جايبين عصيرات ..

المهم عاد جابت معها كرتون كذا زي حق الكيكات كبير.. وحطته في الطاولة.. وقالت لا تشوفون ^_*

جلسنا نضحك على انفسنا لأننا تلقائيا وهي تقول لا تشوفون جلسنا نطل على جنب نبي نشوف وش فيه.. عاد باين شوي انها كيكة .. بس ما ندري وش فيها أو ايش مكتوب عليها مثلاً..

بعدها تجمعوا البنات.. وتكلمت الدكتورة تكلمنا واننا سوينا مجهود رائع بعملنا بالبرزنتيشن.. وانها يمكن تعبتنا بس هذا لـمصلحتنا أولاً وأخيراً..وانها حبت حماسنا مع الموضوع .. وجهودنا عشان نكمل المشاريع اللي بديناها..و تكلمت عن ان السنة الحين راح تنتهي وتتمنى اننا حبينا الكورس اللي عطتنا اياه واستفدنا منه بالشكل الكافي..

وقمنا حنا بدورنا شكرناها هي على حماسها معانا.. والكورس بكل صراحة وقلنا لها: كان من أحلى الكورسات اللي مرت علينا ..وكان منظّم.. وكنا نتعلم منه صدق..! واستفدنا منه كثيير..

بعدها أخذنا كويز على المحاضرة اللي فاتت.. والحمدلله كان حلو..:)

وبذا الوقت جاء دوري أنا اني أقوم لأن البرزنتيشن حقنا راح يبدأ.. أنا اللي راح اقول المقدمة و بداية المحاضرة.. :S

قمت وسميت بالله .. بعدين انتظرت شوي لين هدؤوا البنات والحمدلله .. كانت بدايتي حلوةز. وجهت الحديث للبنات بانهم يقولولي عنوان المحاضرة.. و بعدها تكلمت بشكل سلس والحمدلله ماكنت خايفة.. بعكس ماتوقعت.. D:

خلصت جزئيتي وشكرت البنات وصفقوا لي <~ هم شي.. P:

وكملوا البنات المحاضرة.. كنا 6 بنات كل وحدة تلقي جـزء.. والحمدلله كانت مرة ممتعة المحاضرة..وكانوا بعض البنات جايبين هدايا.. وقمنا نسأل خلال العرض عن بعض الأشاء بالمحاضرة واللي تجاوب نعطيها هدية.. ^_*

وبعدنا قامت مجموعة ثانية من البنات بعـرض برزنتيشن ثاني.. كان قصير وحلو..

وبعدها عاد قامت الدكتورة و كرمت بعض الدكتورات اللي معانا واللي ساعدونا في عملنا للبرزنتيشن..

وبعدين عطتنا الدكتورة شهادات تقدير.. لكـل بنات الدفعة.. تقديراً لمجهودنا اللي سويناه في العروض اللي سويناها.. :)

وقامت فتحت لنا الكيكة الكبيرة اللي جايبتها .. كانت تجنن.. فيها صورة للـرؤوس البلاستيكية (Phantom heads) اللي نشتغل عليها واحنا نتدرب طول السنة على تحفير الأسنان واستعادتها بالمواد..
 كـان مكتوب عليها ( !We Hope You Enjoyed working on us )  خخخخ..
 يعني : نتمنى انكم استمتعتوا و أنتم تشتغلون علينا..!

عاد جلسنا نصور الكيكة <~ طبعاًما صوّرت مامعي جوآلي..-_-.. بس عادي رآح آخذ صور من البنات..

وطبعاً قطعنا الكيكة واكلناها.. ورحنا بعدها للمعمل.. عشان يختبرونا شفهي.. كانوا مجلسينا بمعمل وكل شوي ياخذون 3 بنات ويسألونهم.. وكذا لين ما خلصنا عاد حوالي 4 ونص كذا..<~ أنا كنت بالأخير..:S

وطبعاً احنا يالبنات اللي في الأخير.. ملينا من كثر ما نراجع لبعض وصرنا بالأخير نسولف على مواقف تضحك صارت لنا وحنا صغار.. وانقلبت الدعوة سواليف.. خخخ

بس الحمدلله كان الاختبار حلو واسهل من ماتوقعناه.. يعني سألونا أسئلة سهلة ومهمة لنا..  و لازم كل طبيبة أسنان عشان تشتغل على مريض انها تكون عارفتها..

طبعاً هـذا لأننا بإذن الله السنة الجاية راح نبدأ نشتغل على مرضى خلاص.. *_^

وبعدها الحمدلله خلّص يومنا على خيــر..
 ورغم كل الحوسة و الخرشة اللي صارت فيه إلا انه بالأخيـر يبقى يوم حلو ولا راح أنســاه..

<<~~ أخيراً خلصت كتابة.. خخخ..

طبعـاً التدوينة ذي كتبتها عشان أوثق ذكرياتي .. وعشان أوسـع صدري وصدوركم.. P:
وعـشان حسيـت اشياء كثيرة صارت في هذا اليوم.. ويبقى هذا اليوم  واحد من أكثر من مئة يوم مرّوا علي وأنا في الكلية وخصيصاً في هـذي السنة.. وراح يبقى يذكرني بالسنة هذي واللي رغم الضغط والتعب اللي فيها إلا اننا تعلمنا فيها الكثير,, وطلعنا بحصيلة معلومات كبيرة و مهمة جداً في جميع سنين دراستنا .. بل وحتى بعد تخرجنا.. هذا غير القوة والتحمل والصبر اللي تعلمنا مع الضغط الكبير اللي واجهناه.. ونبقى قدّها وقدود.. D:

 سنة متعبة و مرت على خيـر الحمدلله,, بقى اربع أسابيع بس..! الاسبوع الجاي.. آخر أسبوع.. وبعده راح نبدأ فوراً بالاختبارات النهائية واللي راح تمتد لـ 3 أسابيع..


ياللا خلاص تعبت أكتب وأعصّر مخي,, وجوعانة ابروح آكل لي شيء.. P:  


الله يوفقكم كلكم  وتحلون زين باختباراتكم ,,  وتنجحون ونفرح بكم وكلّـش.. 


وفـتّـكوا بعافية.. D:

* خاص ~
 نورة اختي.. بس انتِ ظللي الكلام ..=$
هـذي التـدوينة أبغاك تقرينـها ..وآسفة على تهزيئي لك أمس ع الماسنجر.. 
بس لأني كنت بـجد مضغوطة ومتأزمة.. وأكيد لما بتقرين هـ المدونة بتعرفين السبب..
واقبلي اعتذاري غصبن عليتس موب على كيفتس .. P:

وهـا قـد أصبحت ابنة العشرين يا أمي ..!

نعم حبيبتي..!

فبالأمسِ أتممتُ عشرين سنة من عمري ..!  ( الخميس : 27-5-2010 )

لا أدري ماذا يجدُر بي أن أقول..!

 أحسست بأن هذا الحدث يستحق مني أني أكتب عنه..

هي أرقام عددية فقط هي التي تتغير ! لا تستحق كل ذلك الحماس!!

ولكنها تذكرني بأني قد كبرت..!

لستُ تلك الطفلة التي لم تعرف الكثير عن الحياة بعد! وتستغرب من الكثير حولها لتعود إليك وتسألك كلما رأت شيئاً جديداً..

ولست تلك المراهقة المتزعزعة بين الطفولة والنضج! تتخبط في اختياراتها وفي تفكيرها و تتـأثر بمن حولها بسهـولة! ثم تعود إليك بأفكار غريبة لتمليها عليكِ وتجادلك فيها ..!

هـآ قد كبرت وأصبحت فتاة ناضجة.. أو ربما أعتقد ذلك..

لقد وصلت لمرحلةٍ أكون فيها بالنضج الكافي لأن أتقاسم وإياكِ الهموم والأفراح.. أصبحـنا صديقتين لا تنفكان عن بعضيهما! وما أحلى تلكَ الصداقة..!

أتعلمين؟!

لم آبه حين لم أجد حولي صديقةً أستطيع أن اشكي لها واتحدث إليها كما تفعل معظم الفتيات في سنّي..! لأني اكتفيتُ بكِ.. أنتِ كُلُّ مالدي من صديقات.. وأنتِ من أغناني عنهن..!

..

هذا اليوم جعلني أتوقف للتفكـير بالسنين القريبة التي مرت و ماذا قدمتُ لها و ماذا أثّـرت فيّ ؟!

هل غيّرت فيني شيئاً يستحقُّ ان أفخـر به..؟!

وهـل أعطيت من جهدي لطاعة ربي ما يرضيه عنَي؟!

هل أرضيتُـكِ أنتِ عنّي ؟!

هل اجتهدتُ كفايةً في طلبي للعلم - والذي ابتعدتُ عنكِ لأجله ؟!

ماذا استفدتُ من بُعدي ؟

ما مدى القوة التي اكتسبتها؟

أهي قوة حقيقية أم ظاهرية؟

أسئلةٌ كثـيرةٌ تقافزت في عقلي .. أحسست بالمسؤولية العظيمة الملقاة على عاتقي..!

فـمهما تخيلت نفسي أني أفعلُ الصواب وأني اجتهد..

إلا أني أجد نفسي مقصّـرةً كثيراً.. وأنسى أو أتناسى في بعض الأوقات..!

ومن الجميل أن يتذكر ويسترجع الشخص نفسه من وقت لآخر..

ربّ ارحمني .. ربّ وقوّني..

..

وها قد اقتربت السنة الدراسية من الانتهاء.. فـ المتبقي منها هو شهر واحد..!

لتعلن هي الأخرى عن بدء سنة جديدة..لأكون قد أتممت 15 سنةً من الدراسة..

هههه.. شيء مضحك حين نقوم بعد السنين نجد أنها أكثر مما نتوقع!

لازلت أتذكر أستاذتي في السنة الابتدائية الأولى.. دروسنا.. وكيف كانت تدرسنا وتحفظنا وتعاملنا بصرامة حتى نجتهد في التعلّم..

وأتذكر في تلك السنة حين أصبت بمـرض العنقز.. والذي أجلسني في البيت لأسبوع أو أكثر.. وكم كنتُ سعيدةً بذلك الأسبوع و تلك الاجازة الخاصة..!

الحمدلله الذي بنعمته تتم الصالحات..

رجائي يا إلهـي أن تجعل خواتيم هذه السنة هي الخيـر..

ربّ يســر لي المذاكرة .. رب ويسـر اختباراتي..

 وأجعل نتائج هذه السنة تسعدني ياكريم.. إنك على كلّ شيءٍ قدير..! 

أنا أريد, و أنت تريد, و الله يفعل مايريد..!

سبحان الله .. اليوم اجتمع علي كم شيء يحكي عن نفس الموضوع..

حسيت ربي يبيني أعرف ذا الشيء وأخليه حلقة في ودني .. ! P:

<~ ألغاااز.. خخخخ


انا اقول لكم..

أول شيء اليوم الفجر قبل لا أنام (أو بمعنى أصحّ أمس!) شفت فيلم هندي اسمه (kismat konnection) و معنى العنوان هو : الحظ والنصيب..! O_o

يحكي عن شاب متخرج من كلية الهندسة.. وكان أدفر دفعته.. D: وكانوا دايم يعطونه شهادات و يكرمونه وكذا..!

ولكــن .. بعد ما تخرج توهّـق ودور وظايف مالقى..!!! ودايم يوقف حظه السيء بينه وبين حصوله على وظيفه أو غيره..!

بعدين يلتقي ببنت.. ويلاقي انه حظه دايما يتحسن لما تكون قريبة منه..! O_o

وتتوالى الأحداث وكذا..


المهم.. الكلام كلّه عن الحظ و نصيب الشخص في الحياة.. وانه صحيح الاشياء تجي بحسب اجتهاد الأشخاص إلا انه الحظ والنصيب يلعب دور !


بعدها اليوم بالليل جلست أسولف أنا وامي 3> و قلتلها اني أحس نفسيتي تتحـسن وأنا أدرس لما أحس اني ما آخذ درجات زي ما أتمنى في بعض المواد.. وأتذكر أنه ربي اللي قدّر لي اللي يحصل.. وأنه بعدين لما أتخرج توفيق ربي بس هو الوحيد اللي راح يقودني للنجاح في حياتي العملية..!


قامت امي تحكيني عن تجربتها وكيف انها كانت قبل لا تتخرج تقول لزميلاتها أنها ماراح تدور على وظيفة أصلاً.. وانه ماهمّها..! وكانت ماتتوقع انها راح تلاقي بسهولة ﻷنها تحس انه معدلها مو حلو..!

بس سبحان الله أول وحدة توظّفت في الدفعة كلها هي..! وكلها توفيق من ربي..! انها بعد تخرجها بكم شهر تزوجت.. وانتقلت لمدينة ثانية.. وكانوا بحاجة للقسم اللي هي متخرجة منه.. وعلى طول بعد ما قدمت عليهم قبلوها وباشرت عملها بعد حوالي 3 أسابيع من تقديمها..!

أمي لما تحكيني عن الحياة تدفعني لـقدام.. D: صحيح انه شيء يخوّف انك ما تضمن وش راح يصير لك بعد ما تجتهد وتسوي اللي عليك..! إلا انك لما تؤمن بأن توفيق ربك هو الشيء للوحيد اللي راح يقودك للنجاح يعطـيك أمل ودفعة كبيرة.. وانه مهما كان ربي مخبي لك أشياء في حياتك و ممكن تكون معجزات..! كلها لما ربّك يقدر لك اللي يبي بس.!

بعد ماخلصت سواليف أنا وأمي .. وقالت لي خلاص بنام جيبي لي السجّادة خل أصلي النافلة قبل أنام.. P;


رحت فتحت كمبيوتري وقمت اتصفح في النت.. وقريت مقال للكاتب : فهد عامر الأحمدي في جريدة الرياض.. عنوانه :

وربّك يفعل ما يريد

يمكنك الحديث عن أهمية الجد والاجتهاد بقدر ما تشاء .. ويمكنك الاشادة بأهمية الدراسة والتخصص في أي انجاز .. كما يمكنك الاستعانة بالأرقام والنسب ودراسات الجدوى في أي مشروع .. ولكن هذا كله لا يقف ولا يساوي شيئا أمام سوء حظ أو حالة نحس تخل بكافة الموازين والفرضيات المنطقية (وتترك الخبير حيران) ..


الرابط


تكلم فيه الكاتب عن الحظ.. وكيف توفيق ربي سبحانه وتقديره تدخل في جميع أمور الشخص..! أصلا سبحان الله من بديت أقرأ في المقال .. وأنا طايرة عيوني O_O و أقول : وش القصة اليوم..!!؟! P: خخخخخخ

عاد حبيت اشارككم بهـذا الموضوع في المدونة.. واللي مقصرة فيها بقوّة.. -_-"

بس بصراحة بسبب انشغالي الكثير والطويييل بدراستي اللي تاخذ وقتي غصب عنّي.. :(

وللحين أتذكر آخر تدوينة دوّنتها وقلت اني بكتب عن أول يوم لي في العيادات .. ولا كتبته للحين..! خخخخ مدري كم مر من وقت.؟! شهر ولا شهرين.؟! P:


* التدوينة نتاج اللحظة "^_^ ولا عدّلت فيها ولا شيء.. P: يارب تكون قميلة.. D:

* ترى دمجت في موضوعي الكلام عن توفيق ربي مع الحـظ..ﻷنه جزء لا يتجزأ منه مايصلح نقول الحظ وبس! هو في الحقيقة توفيق ربي هو اللي يدخل في كل شيء..!

* أشكركم وأحبكم وتكبرون بعيني :'(  إذا رديتوا علي.. "^_^ سواء هنا ولا بالفيس بوك..=$